දේවී භාගවත පුරාණ - මහිෂාසුර මර්ධිනී 01

 

මහීෂ ධානවයාගේ උපත

රම්භ සහ කරම්භ යනු කශ්‍යප මුණිවරයාගේ පතිනිය වන දනු දේවියගේ පුතුන් දෙදෙනා ය; මේ ධානවයන් දෙදෙනා  ලෝකයේ බොහෝ ප්‍රසිද්ධියට පත්වූයේ ඔවුන්ගේ ප්‍රමුඛත්වය නිසාය. ඔවුන්ට කිසිදු ගැටලුවක් තිබුණේ නැත. එනිසා දැඩි තණ්හාවට ආශා වූ ඔවුහු ඉන්දු නදියේ පූජනීය ඉවුරට ගියහ. දීර්ඝ කාලයක් තිස්සේ ඔවුන් තපස් රකින්නට විය. කරම්භ ජලයේ ගිලි ගිය අතර මේ අනුව ඔහුගේ දැඩි තපස ආරම්භ විය; රම්භ යක්ෂයින් විසින් ආරක්ෂා කරන ඇසතු වෘක්ෂයක් පාමුළට ගොස් අග්නියට නමස්කාර කිරීමට පටන් ගත්තේය. මේ බව දැනගත් ස්වර්ගාධිපති වූ ඉන්ද්‍ර තැතිගැන්මට පත් වී ඉන්දු නදිය වෙත ගොස් කිඹුලෙකුගේ ස්වරූපය ගෙන දුෂ්ට කරම්භගේ පාදයෙන් අල්ලා ඔහු මරා දැමුවේ ය.

තම සොහොයුරාගේ මරණය ගැන ඇසූ ඔහුගේ සහෝදරයා වන රම්භ බොහෝ සේ කෝපයට පත් වූ අතර තමාගේම හිස අග්නියට පූජා කිරීමට තීරණය කළේය. ඔහු කෝපයට පත් වී හිස වම් අතින් ද, පොරවක් ඔහුගේ දකුණු අතින් ද අල්ලාගෙන සිටියේ ය, එවිටම අග්නි දෙවියන් ඔහුට ජිවිතය පිළිබඳ ඥානය ලබා දි ඔහුව මෙම පාපි ක්‍රියාවෙන් ඉවත් කොට ආමන්ත්‍රණය කළේය.

ඔබ මෝඩයෙකි; ඔබේ හිස පූජා කිරිමට තීරණය කරේ ඇයි? තමන්ගේ ජිවිතය පූජා කිරිමට මහා පාපයකි; එම පාපයෙන් මිදීමට ක්‍රමයක් නැත. ඇයි ඔබ එහෙනම් එවැනි පාපයකට යොමු වෙන්නේ? දැන් ඔබ මරණය නොසොයා මාගෙන් වරයක් ඉල්ලන්න ඒ අනුව ඔබේ සුභසාධනය ඔබට ලැබෙනු ඇත.

අග්නි දෙවියන්ගේ මිහිරි වදන් ඇසූ රම්භ තම හිස්කෙස් අත්හැරමෙසේ කීවේය: - දෙවිවරුන්ගේ ස්වාමීනි! ඔබ මාගේ තපස කෙරෙහි සතුටු වන්නේ නම්, මට ආශීර්වාදය ලබා දෙන්න; මාගේ සතුරන්ගේ බලවේග විනාශ කර දමන, තුන් ලෝක පාලනය කර හැකි දෙවියන්, ධානවයන් සහ මිනිසුන් විසින් පරාජය කළ නොහැකි සියල්ලන් විසින් ගරු කරනු ලබන පුත්‍රයෙකු ලබා දෙනු මැනවී.

අග්නි දෙවියන් මෙසේ පැවසීය: - අහෝ! ඔබ කැමති පරිදි ඔබේ පුත්‍රයා ඔබට ලැබෙනු ඇත. එබැවින් ඔබ සියදිවි නසා ගැනීමට තැත් කිරීමෙන් වළකින්න. රම්භ!  ඔබට පළමුව හමුවන ඕනෑම වර්ගයක ඕනෑම ස්ත්‍රියකු සමඟ, ඔබ සංවාසයේ යෙදුනු විට ඔබට වඩා බලවත් පුත්‍රයකු ලබා ගත හැකිය; මෙහි කිසිදු සැකයක් නැත.

මේ අනුව අග්නි දෙවියන්ගේ මිහිරි වචන ඇසූ රම්භ, යක්ෂයන් වටකර අලංකාර ස්ථානයකට ගිය අතර එහි මහීෂ ස්ත්‍රියක් දැක ඇය කෙරෙහි දැඩි ආශාවක් ඇති වී ඇය සමඟ ලිංගික සම්බන්ධකම් පැවැත්වීමට සිතා ගත්තේය. ඇයද සතුටින් ඔහුගේ අරමුණට එකඟ වූ අතර ඉරණම අනුව ඔවුන් දෙදෙනා ලිංගිකව හැසිරී එයින් ඇය  ගැබ් ගත්තාය. ඔහු තම ආදරණීය බිරිඳව ඇයගේ ආරක්ෂාව සඳහා පාතාලය වෙත ගෙන ගියේය. එක් අවස්ථාවකදී තවත් මහීෂයෙකුටද ඇයව අයිති කර ගැනීමටද අවශ්‍ය විය. රම්භ ඔහුව මරා දැමීමට සූදානම් විය තම බිරිඳගේ ආරක්ෂාව සඳහා මී හරකාට පහර දුන්නේය . කලබල වූ මී හරකා ඔහුගේ තියුණු අංවලින් ඔහුට දරුණු ලෙස පහර දුන් අතර රම්භ සිහිසුන්ව වැටී අවසානයේ මිය ගියේය. තම ස්වාමිපුරුෂයා මියගොස් ඇති බව දුටු ඇය භීතියෙන් යක්ෂයන් යටතේ රැකවරණය සලසන ඇසතු වෘක්ෂය වෙත පලා ගියාය. නමුත් කාමයෙන් උමතු වී සිටි  මී හරකාද ඇය පසුපස දිව ගියේය.  ඇය පසුපස ලුහුබඳින මී හරකු දුටු යක්ෂයන් ඇයව ආරක්ෂා කිරීමට ඉදිරිපත් විය. මහීෂයා  සහ යක්ෂයන් අතර දරුණු සටනක් ඇති විය. අවසානයේ ඔවුන්ගේ හී ප්‍රහාර හමුවේ  මී හරකා බිම වැටී මිය ගියේය. රම්භට  බොහෝ සෙයින් කැමති වූ යක්ෂයෝ ඔහුගේ මළ සිරුර පවිත්‍ර කිරීම සඳහා ආදාහනය කළ අතර තම සැමියාගේ චිතකය දුටු මහීෂ ස්ත්‍රිය එම ගින්නට පැන තම ජිවිතය පූජා කිරිමට තීරණය කළාය. යක්ෂයෝ එයට විරුද්ධ වුවද; නමුත් ඇය ඉක්මනින් තම ස්වාමිපුරුෂයා සමඟ දැවෙන ගින්නට ඇතුළු විය. ඇය ගර්භාශයෙන් බලවත් මහීෂාඅසුර ජන්මය ලැබු අතර; රම්භ ද තම පුත්‍රයාට ඇති ස්නේහය හේතුවෙන් වෙනත් ස්වරූපයකින් අග්නිය තුළින් ප්‍රකට විය. රම්භ ඔහුගේ ස්වරූපය වෙනස් කිරීමෙන් පසුව රක්තවීජ ලෙස හැදින්විය. ඔහුට ලැබු වරය  අනුව උපන් මෙම ශක්තිමත් ධානවයා මහීෂාසුර නමින් ප්‍රසිද්ධියට පත්විය. අසුරයන් විසින් ඔහුව  සිංහාසනය මත ස්ථාපනය කළේය. ඉතා බලසම්පන්න රක්තවීජ සහ මහීෂ සියලු දෙවියන් මනුෂ්‍යන් සහ අසුරයන් ඉදිරියේ අපරාජිත විය.

සුමේරු පර්වතය මුදුනට ගිය මහිෂාසුර බ්‍රහ්ම දෙවියන් උදෙසා ඉතා අනර්ඝ තපසක් ආරම්භ කරේ තම ශක්තිය තව තවත් වඩවා ගැනීමටයි. වර්ෂ දසදහසක් ඉක්මවූ කළ ඔහුගේ තපස කෙරෙහි ප්‍රසන්න වූ බ්‍රහ්ම දෙවියන් වර ලබාදීමට ඔහු ඉදිරියේ ප්‍රකට විය. 

ඕ ගුණවත් ආත්මය! ඔබ අපේක්ෂිත වරය කුමක්දැයි මාගෙන් විමසන්න; මා ඔබට ආශීර්වාද කරමි

මහීෂ මෙසේ පැවසුවේය: - “ස්වාමීනි, මට අමරණීය වීමට අවශ්‍යයි! එබැවින් අහෝ දේවතාවන්ගේ මුත්තනුවනි! මරණයට බිය දුරුවීමට මා වෙනුවෙන් යමක් කළ හැකිද?

බ්‍රහ්ම මෙසේ පැවසීය: - “මහීෂ!  යම් කෙනෙකු ජන්මය ලබන්නේද ඔහුගේ මරණය නියතියකි. මෙය ස්වභාවධර්මයේ සදාකාලික නීතියයි. මෙය තරයේ වටහා ගන්න. උපන් යමෙක් මිය යා යුතුය; යමෙක් මිය ගිය විට යමෙක් ඉපදෙන්නේ ය. තව කුමක්ද මීට වඩා පැවසීමට අවශ්‍ය, උස් පර්වත, විශාල සාගර සහ සියලු ජීවීන්ද කාලයත් සමඟ මිය යනු ඇත. එබැවින් අමරණීයභාවය හැර වෙනත් වරප්‍රසාදයක් විමසන්න. මම එය ඔබට ලබා දෙන්නෙමි. 

මහීෂ මෙසේ පැවසුවේය: - “දෙවියනි! එසේ නම්, දේව, ධානව මනුෂ්‍ය හෝ කිසියම් පුරුෂ ලිංගයෙකු අතින් මාගේ මරණය සිදු නෝවිමට වරයක් ප්‍රදානය කරන්න. ස්ත්‍රියක් පමණක් මාගේ මරණයට හේතු විය හැක. නමුත් කාන්තාවක් මා මරා දැමිය හැක්කේ කෙසේද? ඔවුන් ස්වභාවයෙන්ම ඉතා දුර්වල කොට්ඨාසයකි.! ”

බ්‍රහ්ම මෙසේ පැවසීය: - “ධානව රජුනී! ඔබේ මරණය නිසැකවම ස්ත්‍රියක් හරහා ඕනෑම වේලාවක සිදුවනු ඇත. අහෝ වාසනාවන්තය! ඔබව මරණයට පත් කිරිමට කිසිඳු පුරුෂයෙකුට නොහැකි වනු ඇත. ”

මේ අනුව ඔහුට ආශීර්වාද ලබා දී මහාබ්‍රහ්මයා තම වාසස්ථානයට ගිය අතර අසුරයන්ගේ ස්වාමියාද ඔහුගේ ස්ථානය වෙත ආපසු ගියේය.

මහා ඍෂි වේද ව්‍යාස විසින් රචිත ශ්ලෝක 18,000 කින් සමන්විත ශ්‍රීමත් දේවී භාගවත මහාපුරාණයේ 5වන කාණ්ඩයේ දෙවන පරිච්ඡේදය වන මහීෂ ධානවයාගේ උපත මෙතෙකින් සමාප්තය.

මතු සම්බන්ධයි...